வியாழமாற்றம் 14-02-2013 : காதல்

 

என் காதலே!

tumblr_ledwffjm091qz8f0mo1_500

மாளவிகா அக்கா பயங்கர கெட்டிக்காரி. பயங்கர வடிவு. பயங்கரமா இங்க்லீஷ் கதைப்பா. இப்படி பல பயங்கரங்கள் அவவிடம். அதனாலேயே அவவை எனக்கு பயங்கரமா பிடிக்கும். அப்பாவிடம் சர்வயிங் படிக்க வரும் சமயம் கணக்கு கொப்பியை எடுத்து கொண்டு போய் நானும் பக்கத்தில் உட்காருவேன். ஏற்கனவே செய்து பிழை திருத்திய கணக்கு பேப்பரை திரும்பவும் அவவுக்கு முன்னாலேயே செய்து முடிப்பேன். “மண்டைடா நீ” என்பார். வெளிப்படை உண்மை நிறுவிவிட்டு கீழே இரண்டு கோடு வேறு சரிவாக சர்க் சர்க்கென்று அடிப்பேன். ஜீனியஸ் என்பார். அப்பா கிளையண்டோடு பேசுகின்ற சமயங்களில் செஸ் விளையாடுவோமா? என்று கேட்டு அடம் பிடித்திருக்கிறேன். கோபப்படமாட்டார். நிறைய கதைப்புத்தகம் வாசிப்பார். அம்மாவுக்கு கொண்டுவந்து கொடுப்பார். ஒரு முறை அவர் கொண்டுவந்த தீப ஒளியை வாசித்துவிட்டு நானும் வளர்ந்து ரமணிச்சந்திரன் ஹீரோ போல வருவேன் என்று சொன்னேன். இந்த வயசில உனக்கு ரமணிச்சந்திரன் கேட்குதா என்று மெல்லமாய் குட்டுவார். வலிக்கவே வலிக்காது. அடுத்த நாள் அம்புலிமாமா ஒன்றை கொண்டுவந்து தருவார். விறகு வெட்டி தங்க கோடரி தன்னது இல்லை என்று சொல்லுவான். சுத்த போர் என்றால் “மற்றதெல்லாம் வளர்ந்தாப்பிறகு வாசிக்கலாம்டா”. கியூட்.

 

திடுப்பென்று ஒருநாள் மாளவிகா அக்கா தன்னுடைய திருமண அழைப்பிதழை அப்பாவிடம் நீட்டியபோது எனக்கு கண்கலங்கிவிட்டது. “அப்ப என்னை கலியாணம் செய்ய மாட்டீங்களா அக்கா?”. “அய்யோ .. ச்சோ ஸ்வீட் .. நீ நல்லா படிச்சியண்டா என்னை விட ஹண்ட்ரட் டைம்ஸ் பெட்டர் கேர்ள் கிடைப்பாடா ..இந்த வயசில என்னை கட்டி நீ என்ன தான் செய்வ சொல்லு?”. “என்ன செய்யேலாது .. சொல்லுங்க?”. மீண்டும் அதே குட்டு. கலியாண வீட்டன்று மாப்பிள்ளையிடம் தன்னுடைய லவ்வர் என்று அறிமுகப்படுத்த அந்தாள் வேறு என் தலையில் மெதுவாக ஒரு குட்டு போட. வலித்தது. முதன் முதலாக.

மாளவிகா அக்கா இல்லாத வாழ்க்கையில் அர்த்தமில்லை என்று பிள்ளையார் கோயிலடி அரச மரத்தில் போய் குந்தியிருந்து அஞ்சு நிமிஷம் வெய்ட் பண்ணியிருப்பேன். ஒளிவட்டம், ஞானம் நத்திங் ஹப்பிண்ட். ஆனால் அந்த வழியால் கார்த்திகா போனாள். நான் மரத்தடியில் தனியே இருந்ததை கண்டு அக்கம் பக்கம் பார்த்துவிட்டு சிரித்தாள். “சித்தகத்தி பூக்களே சுத்திவர பார்க்குதே” என்று எஸ்பிபி வொய்ஸ் பின்னணியில் சிரித்துக்கொண்டே பாட, கார்த்திகா அந்த கணமே யாவுமானாள். அடுத்தநாள் மணி டியூஷனில் முதல் வகுப்பு கணக்கு. கோண்டாவிலில் இருக்கும் அவள் வீட்டுக்கு தின்னவேலியில் விடியக்காலமையே சைக்கிள் மிதிக்கவேண்டும். அவள் கேட்டடியால் வெளியே வரும் மட்டும் காத்திருந்து நூறு மீட்டர் பின்னாலே, போகிற போக்கில உதயன் பேப்பரை வாங்கி ஹாண்டிலில வச்சே வாசிக்கிறது. அவள் எப்போதாவது திரும்பிப்பார்க்கும்போது என்னையும் பேப்பரையும் பார்த்தால் நல்லது தானே. “பெடியன் ஒரு படிப்பாளி” என்று யோசிக்கலாம். கொக்குவிலில் இருக்கும் மணி டியூஷனுக்கு எதுக்கடா கோண்டாவில் போறாய்? என்று யாராவது கேட்டால் இன்ஸ்டன்டான பதில் “அம்மா கால் கிலோ எலும்பில்லாத இறைச்சி கொண்டாவில் கடைல வாங்க சொன்னவா”.

சுகுமாரனும் கார்த்திகாவுக்கு ரூட்டு போடுகிறான் என்று அவனும் நானும் ஒரே கடையில் ப்ளேன்டீ குடிக்க ஆரம்பித்தபோது தான் தெரிந்தது. அவன் கொஞ்சம் ஸ்டைல். மேவி இழுப்பான். பிடரியிலே இரண்டு பக்கத்தில் இருந்தும் தலைமயிர் ஒன்று கூடி நடுவிலே கொடு வரையும். நமக்கு கூடுவதே பெரிய விஷயம். சுகுமாரனுக்கு முன்னாலே நான் ஒரு சப்பை என்று புரிந்ததால் எங்கிருந்தாலும் வாழ்க என்று மீண்டும் அரச மரமே கதியானது.  பின்னாலே சுகுமாரன் கார்த்திகாவுக்கு நாச்சிமார் கோவிலடியில் கடிதம் குடுத்ததும் அவள் கிழித்து எறிந்ததும், கேள்விப்பட்டபோது சுகமாக இருந்தது. அவளுக்கு நான் மானசீகமாக எழுதிய கடிதங்களை பயத்தில் கிழித்து போட்டுவிட்டேன். சுகுமாரன் அதே கடித வரிகளை மீண்டும் மீண்டும் பல திகாக்களுக்கு கொடுத்து கிழி வாங்கி …. பல வருடங்களாக டச்சில் இல்லை. மூன்று வருடங்களுக்கு முன்னர் தொலைபேசியில் அழைத்தான்.

subramaniapuram-movie-2“டேய்எனக்கு கலியாண வீடடா”
“வாவ் .. பொண்ணு யாரு?”
“கெஸ் பண்ணேன் … உனக்கும் தெரியும் ஆளை”,
“ வதனாவா?”.
“இல்லை மச்சான் .. அது பிழைச்சு போச்சு ..”.
“ஓ சொறி .. துவாரகாவா?”.
“அவள் ஒரு அமுசடக்கி மச்சான் ..வேலைக்காகாது”.
“சுபாஷினி?”.
“ம்ஹூம்”.
“லோஷனா?” ..
”டேய் உன்னை விட்டா சொல்லிக்கொண்டே இருப்பே .. நானே சொல்லுறன் .. ”

பெயரை சொன்னான். You gotta be kidding maite!

கார்த்திகா இல்லை என்றானதும் இம்முறை மணி அடித்து பாட்டு கேட்டது அபர்ணாவிடம் தான். ஆத்திசூடி ரோட்டில வழி மறிச்சு ஹெல்த் சயன்ஸ் நோட்ஸ் கேட்ட போது தான் மிதிலை சம்பவம் முதன் முதலில் இடம்பெற்றது. இத்தனை பேர் இருக்க கோழி கிறுக்காய் இருக்கும் என் நோட்சை ஏன் கேட்டாள் என்று யோசித்த மறுகணம் வயிற்றுக்கும் தொண்டைக்கும் உருவமில்லா உருண்டை எல்லாம் ஓட தொடங்கியது. கட்டுப்படுத்தி வைக்க பெரும் பிரயத்தனம். அடுத்த நாள் அவள் திருப்பி தந்தபோது ஒவ்வொரு பக்கமாக திருப்பி ஏதாவது குறிப்பு குடுத்திருக்கிறாளா? எனி ஹின்ட்ஸ்? சிலவேளை சவர்க்காரத்தில எழுதி இருப்பாளோ? கொப்பி நனைந்து மை எல்லாம் கரைஞ்சது தான் மிச்சம்.

aishwaria300ஏஎல் படிக்கும்போது ஒரு பெண்கள் பாடசாலையில் “என்ன தவம் செய்தனை யசோதா” என்று ஒரு பெண் பரதநாட்டியம் ஆட, என்ன பொண்ணுடா இது? கண்கள் தனியாகவே வானத்துக்கும் பூமிக்கும் ஏறிக்குதிக்கும். பார்த்துக்கொண்டிருக்கும் போதே “விழிகளை வீசிய இளைய கொடி, இந்த விபத்துக்கள் உன்னால் நேர்ந்ததடி” என்று முரளி பாடிக்கொண்டே மேடைக்கு போனார். என்ன ஒன்று பக்கத்தில் திரும்பிப்பார்த்தால் பல முரளிகள் பாடிக்கொண்டிருந்தார்கள்.

வளர வளர பார்த்தவுடன் இடம்பெற்ற விஷயங்கள் கொஞ்சம் கொஞ்சம் குறைய தொடங்கி மெதுவாக பார்க்க பார்க்க இடம்பெற தொடங்கியது. அதே நேரம் தூர நின்று காதலித்துவிட்டு இரவு வீட்ட போய் சிவனே என்று பொன்னியின் செல்வன் வாசிக்க முடியாத சூழல். வெறும் lust மற்றும் attraction இரண்டுமே இருபதுகளில் attachment க்குள் நுழைந்துவிடும் சந்தர்ப்பங்கள் வலுவாக ஏற்படத்தொடங்கும். இதில் தப்பவேண்டும். அனேகமா அப்பா அம்மா பார்த்த பெண்ணையோ ஆணையோ திருமணம் புரிந்தவர்கள் இந்த இடத்தில் தங்களை இன்டெலிஜண்ட் என்று நினைத்துக்கொள்ளலாம். அது போங்காட்டம். அவர்களுக்கு சந்தர்ப்பம் அமையவில்லை. அவ்வளவே. Love is not a feeling but an ability என்று எங்கோ ஒரு ஆங்கில படத்தில் கேட்டதாக ஞாபகம். ஒரு ஆணிடம் போய் ப்ரொபோஸ் பண்ணுவதும், பெண்ணிடம் ஹாய் சொல்வதும் இலேசல்ல. கொஞ்சம் guts வேண்டும்.

அப்படி என்றால், உண்மைக்காதல், பத்து வருஷம் காதலித்து திருமணம். ஐம்பது வருஷ தாம்பத்ய வாழ்க்கை, தெய்வீக காதல், ஒருவரை ஒருவர் உணர்ந்து புரிந்த செம்புலப் பெயனீர் மாட்டர் ..இதெல்லாம் பொய்யா? சுஜாதா படிச்சு படிச்சு சொன்ன விஷயம் தான். வெறுமனே ஒரே வார்த்தையில் ஹோர்மோன்கள் என்று முடிக்காமல் கொஞ்சம் ஆலாப் பாடிப்பார்ப்போம்.

காதலிலே மூன்று பிரதான கட்டங்கள் என்கிறார்கள். Lust, attraction and attachment. அந்த பெண் பரதநாட்டியம் ஆடியபோது “வாவ்” என்று   உடனே ஓடிப்போய் டூயட் பாட என்ன காரணம்? டெஸ்ட்டோஸ்தரன் மற்றும் ஈஸ்ட்ரோஜன். இனவிருத்திக்கான இயற்கை வைக்கின்ற முதல் அடி. பார்த்தவுடன் இந்த இரண்டு ஓமோன்களையும் அதிகப்படியாக பட்ஜெட்டில் ஒதுக்கீடு செய்ய, உடலில் அதற்குரிய டிபார்ட்மெண்ட்கள் தயாராகின்றன. வோர்ம் அப். இந்த நிலையை ஆங்கிலத்தில் lust என்பார்கள். தமிழில் சிற்றின்ப இச்சை என்று கூகிள் சொல்கிறது. கொச்சைப்படுத்தாதீங்க பாஸ். சிற்றின்ப இச்சை ஒரு இரண்டு மூன்று வாரத்துக்கு தாங்கும் என்கிறார்கள். அதற்குள் நீங்கள் அயலூர் போனாலோ இல்லை உங்கள் தாத்தா செத்துப்போனாலோ அந்த ஓமோன்கள் குறைந்து .. லஸ்ட் பஸ்டாகிடும்.

அதையும் தாண்டி மூன்று வாரங்களுக்கு அந்த ரெண்டு ஓமோன்களும் சுரந்து கொண்டிருந்தால் அடுத்த நிலை வருகிறது. attraction. ஈர்ப்பு. இந்த இடத்தில் உதிரியாக வாய்க்குள் நுழைய முடியாத புதிய ஹோர்மோன்கள் சுரக்க ஆரம்பிக்கின்றன. பீரோமோன்ஸ், டோபமின், நோரிபினேபிரின், செரடோனின் என்று பெயர்கள் முக்கியமில்லை. அவை என்ன செய்கின்றன என்பது தான் முக்கியம். மூளையில் சந்தோஷமையம் ஒன்றை இவை ஏற்படுத்துமாம். அவளை நினைக்க நினைக்க சந்தோசம் பீறிடும். பக்க விளைவுகளும் இல்லாமலில்லை. அதிகமான இதய துடிப்பு, பசி இல்லாமை, தூக்கம் இல்லாமை … ஒரு வித எக்ஸைட்மெண்ட். கூர்ப்பின் உச்சம் இது. உங்களை தூண்டிவிட்டு அவளின்/அவனின் பின்னால் அலையவிட்டு எப்படியாவது மடக்கிவிட்டால் .. that’s exactly nature wants. இது ஒரு ஒன்றரை இரண்டு வருடங்கள் இழுக்கும் என்கிறார்கள். இரண்டு வருஷம் ட்ரை பண்ணியும் செருப்பு தான் என்றால், ஓமோன்கள் பெருகுவது நின்றுவிடும். மூளை சுதாரித்துவிடும்.  விளைவு .. “இவள் இல்லாட்டி உலகத்தில வேற பொண்ணுங்களா இல்ல? go to hell”, “ஆண்கள் எல்லோருமே ஏமாற்று பேர்வழிகள்” என்று ஸ்டேடஸ் போடுவீர்கள். அடுத்த நாளே ஷேவ் பண்ணிவிட்டோ, இல்லை முடியை ஸ்ட்ரைட் பண்ணிவிட்டோ, profile picture மாற்றிவிட்டு, சிங்கிளாக இருக்கும் ஆணின்/பெண்ணின் facebook profile களை மேய்வீர்கள். அவர்கள் ஸ்டேடஸ் எல்லாம் லைக் பண்ணி, “awesome” என்று கொமென்ட் போட்டு .. மீண்டும் லஸ்ட்!

இல்லை, அவள் ரியாக்ட் பண்ணுகிறாள். அவன் எஸ்எம்எஸ் தொடர்ந்து அனுப்புகிறான். கச்சல் கப்புசீனோவை ஒரு பாக்கட் சீனி கூட போடாமல் மூன்று மணி நேரம் குடிக்கிறீர்கள் என்றால் நீங்கள் அடுத்த ஸ்டேடஸுக்கு ரெடி என்று அர்த்தம். அடுத்த நிலை. Attachment. இது நடக்கும்போது முதன் முதலாக கண்ணை பார்த்து பேச தொடங்குவீர்கள். பாசாங்குகள் குறைய தொடங்கும். நிஜ முகங்கள், வண்டவாளங்கள் வெளிப்படும். வெளிப்பட்டால் பிரச்சனை தான். சண்டை தான். இந்த உலகத்தில் யாருமே ஒத்த சிந்தனைகளோடு வலம் வர முடியாது. அவ்வளவு ஏன், ஒரு தனிமனிதனின் சிந்தனையே ஒவ்வொரு நிமிடமும் மாறுபடலாம். ஆக இரண்டுபேர் ஒன்றாக இருந்து வாழ்க்கை நடத்துவது என்பது? சான்ஸே இல்லை. பிரியவேண்டி வரும். அப்படி விட்டு விட முடியுமா? இதை தவிர்க்கவேண்டுமே? அதற்கு தான் ஒக்சிடோசினும் வசோபரசினும் அறிமுகம் ஆகிறார்கள்.  காதலிக்க ஆரம்பித்து ஒன்றிரண்டு வருடங்களுக்கு அந்த ஓமோன்கள் இதற்கென்றே பெருகுமாம்.  அதுவும் முதல் வருஷம் பின்னி பெடலெடுக்கும். “இங்கிவளை நான் பெறவே என்ன தவம் செய்தேனோ?” என்று ஸ்டேடஸ் போடுவீர்கள். “நீ என்னை தாலாட்டும் தாயல்லவா?” என்று வாலியை கொப்பி பண்ணுவீர்கள்.  survival instinct இற்காக கூர்ப்பு செய்திருக்கும் அதிசயங்கள். தொடர்பு நிலைத்து நீடிக்கவேண்டும் என்பதற்காக இயற்கை செய்யும் பகீரத பிரயத்தனங்கள் இவை.

Chemical_basis_of_love

அப்ப என்ன சொல்ல வாறீங்க பாஸ்? தெய்வீக காதல் என்பதே இல்லையா? இல்லையென்று சொல்லவில்லை .. இருந்தா நல்லா இருக்கும் என்று தான் சொல்லுறன்!

இவற்றை தாண்டியும் பிரிவு வருகிறதே என்றால் பல காரணங்கள். உடம்பில் கிட்டத்தட்ட ஐம்பது ஹோர்மோன்கள் இருக்கின்றன.  இதில் காதலுக்கு ஒரு ஏழு இருக்கிறது. பிரிவுக்கான காரணங்களை தூண்டும் ஹோர்மோங்களின் வீரியம் இந்த ஏழு ஹோர்மோன்களை தாண்டும்போது “பிரிந்துவிட்டால் உயிர்தப்பலாம்” என்ற எண்ணம் வரும். மூளை சாதக பாதக விளைவுகளை எடை போட தொடங்கும். எந்த ஹோர்மோன் அதிகமாக சுரக்கிறது, கலாச்சாரம் என்ன சொல்லிக்கொடுத்தது, விட்டுக்கொடுக்கும் இயல்புகள், சகிப்புத்தன்மை, பிரிந்தால் சமாளிக்கலாமா? நமக்கு என்ன குறை? குழந்தைகள், இப்படி பல காரணங்களை மூளை அடுக்கும். இதெல்லாமே கூட்டிக்கழிச்சு ஒன்றாக இருப்பதே பெட்டர் என்று நினைத்தால் உண்மைக்காதல் என்று காதலர் தினம் கொண்டாடலாம். இல்லையா? காதல் எல்லாம் நத்திங் பாஸ். வெறும் ஹோர்மோன் பிசினெஸ்!

சிலவருடங்களுக்கு முன்னர். கூட வேலை செய்யும் பெண். அவள் ஒரு தேவதை. “மச்சான் கட்டினா இந்த பொண்ணு தாண்டா, இல்லைன்னா கலியாணமே வேணாம் .. என்ன அழகுடா” என்று கொகுலிடம் போய் சொன்னேன்.

 
“டேய் டேய் .. இது ஈஸ்ட்ரோஜன் .. அண்ட் டெஸ்ட்டோ.. சம்திங் .. கவர்ச்சி .. செக்ஸ் .. இச்சை மச்சான்.. வேண்டாம்”
“இல்லைடா இது வேற .. நான் மச்சுவர்ட்டான ஆள்டா மத்தவங்கள் மாதிரி இல்லை”
“அப்பிடியா ஒண்டு செய் . மூணு வாரம் .. ஓமோன் எல்லாம் அடங்கட்டும் .. பார்க்கலாம்”

மூன்று வாரங்களுக்கு பின்னர் கோல் பண்ணினேன் அவனுக்கு.

“இன்னும் இங்க வலிக்குதடா .. ஷி இஸ் த கேர்ல் .. .. நிச்சயம் இது லவ் தாண்டா.. ஐ வோண்டு ப்ரோசீட்”
“நல்லா தெரியுது.. இது அட்ட்ராக்ஷன் ஸ்டேஜ் ”
“இல்லடா .. வந்து ..”
“உனக்கு நித்திரை குழம்புதா?”
“வந்தா தானே குழம்ப”
“இதயம் படக் படக் என்று துடிக்குதா?”
“இரண்டு ‘படக்’ குகளுக்கிடையில் இன்டர்வலே இல்லை மச்சி”
“பசி?”
“தண்ணி குடிச்சா கூட வாந்தி வருது”
“ஆ . இது பீரோமோன்ஸ், டோபமின் என்று பக்கா போதைப்பொருள் ஹோர்மோன்கள் மச்சான் .. அடுத்த ஸ்டேஜ் .. விழுந்துடாத .. “
“உனக்கு விளங்குதில்ல மச்சி .. நான் மற்ற ஆக்கள் மாதிரி இல்ல .. இட்ஸ் ரியலி ஸ்ட்ரேஞ் .. அவளோட எந்த நேரமும் பேசோணும் போல இருக்கு .. கார்த்திகா அபர்ணாவோட கூட இவ்வளவு பீலிங் வந்ததில்ல”
“கொஞ்ச நாளா இப்பிடித்தான் இருக்கும் மச்சி .. ஒண்டு செய் ஒரு வருஷம் கழிச்சு வா … அப்பவும் பசி இல்லை எண்டால் தென் வீ கான் பி ஷூவர்”

இரண்டு வருடங்கள் கழித்து காந்தி உணவகத்தில் மீட் பண்ணினோம். கோகுல் தான் ஆரம்பித்தான்.

“டேய் .. நீ ரெண்டு வருஷத்துக்கு முன்னாலே .. அந்த பொண்ணு .. யூ ரிமெம்பர்?”
“ஓ அதுவா? தப்பீட்டன் மச்சி .. நல்ல காலம் … தட் வோஸ் ஜஸ்ட் எ கிரஷ் .. ஒண்டுமே சரி வராது எண்டு வீட்டில பொம்பிளை பாக்க சொல்லீட்டன்”
“நல்ல காலம் .. தட்ஸ் குட் .. அப்பவே சொன்னேன் இல்ல”
“ஓமடா .. நீ சொன்ன .. எனக்கு விளங்க இல்ல .. சரி விடு .. பயங்கர பசி .. நான் ஒரு தம் புரியாணி அடிக்க போறன் .. உனக்கென்ன வேணும்”
“எனக்கு கொஞ்ச நாளா என்னவோ பசியில்ல மச்சான் .. ஒரு ஜிஞ்சர் பியர் ஓடர் பண்ணு ”

&&&&&&&&&


பிரியா பிரியா ஓ பிரியா

90கள் காதல் பாடல்களின் பொற்காலம். ராஜா, ரகுமான், தேவா, வித்தியாசாகர் என்று நான்கு திசையிலிருந்தும் மெலடி தாக்குதல்கள். இடையிடையே ராஜ்குமார், சிற்பி, கார்த்திக் + யுவன் ராஜாக்கள் வேறு. என்னுடைய பதின்ம வயதுகளும் சேர்ந்ததோ என்னவோ எக்ஸ்டிராவாக நாலு லீட்டர் எஸ்டோரஜன் சுரந்திருக்கலாம். விளைவு பாடல்களை இம்மை மறுமை இல்லாமல் காதலிக்க ஆரம்பித்த காலம். இந்த பாட்டு சிவத்திரன் அண்ணா (பின்னாளில் கெமிஸ்ட்ரி சேர் ஆனார்) ஒரு முறை கம்பஸில் அபிராமி அக்காவுடன் சேர்ந்து பாடுவதற்காக எங்கள் வீட்டில் வந்து ரிகர்சல் பண்ணுவார். சரணம் நடுவில் மூக்கு பிய்யும். முடிந்த பின் நல்லா இருக்கா? என்று கேட்பார். பின்னீட்டிங்க அண்ணா!

பாடல் காட்சி மொக்கை, கண்ணை மூடுங்க ப்ளீஸ்

 

காதல் எனும் போதை கட்டி விட்ட ராதை
கல்யாண நாளைத் தேடி ஏங்குகிற பாவை

என்பார் எஸ்பிபி. ஒகே. ஆரோகணம் ஆரம்பிக்கிறது. இன்னும் மெயின் குரல் வரவில்லையே.

வானவெளி மேகம் தேன்மலர்கள் தூவும்
வருங்காலம் வாழ்கவென்று குயிலினங்கள் கூவும்

There you go. சித்ரா வந்துவிட்டார். கேட்கும்போதே குரலில் ஒரு வெட்கம் இருக்கும். 

“அந்த அந்தரத்து சந்திரனை பிடிப்போமா “

உச்ச சுரம். அங்கேயே நிற்பார் சித்ரா.

“நாம் அங்கு ஒரு பள்ளியறை அமைப்போமா”

இப்போது உச்சியில் இருந்து அவரோகணம் கட கட கட வென விழும்.

“ஒரு பந்தயத்தை வைத்து சுக மந்திரத்தைப் படிப்போமா”

தேவாவை யாரென்று நினைத்தீர்கள்?

 


கம்பனும் ஷெல்லியும் கைப்பிள்ளையும்!

படைப்பிலக்கியங்களில் காதலை பின்னி பெடல் எடுக்கலாம். எடுத்திருக்கிறார்கள். கம்பர் அதிலே முன்னோடி. மிதிலை காட்சி வான்மீகியில் இல்லை. அதிலே ராமன் சீதையை காண்பதே வில் ஓடிந்தபின்னர் தான். ஆனால் கம்பர் காதல் மன்னன் அல்லவா. அதுவும் இறங்கி விளையாடும் காதல் மன்னன். சீதையும் ராமனும் முதன் முதலில் பார்க்கின்ற மிதிலை காட்சியிலே வருகின்ற வரிகள் எல்லோருக்குமே தெரிந்தது தான்.

கண்ணொடு கண் இணை கவ்வி ஒன்றை ஒன்று
உண்ணவும் நிலைபெறாது உணர்வும் ஒன்றிட
அண்ணலும் நோக்கினான் அவளும் நோக்கினாள்.

ஆனால் அதற்கப்புறம் என்ன? பார்த்தாங்களே .. ஏதாவது பேசினாங்களா? எப்படிப்பேசுவது? அதான் பாற்கடலில் ஒன்றாக இருந்து வாழ்ந்தவர்கள், பிறவி எடுத்து இத்தனை ஆண்டுகளாக வெய்ட் பண்ணியிருந்து இன்றைக்கு சந்திக்கிறார்களே. ஏதாவது பேச்சு வருமா என்ன?

“ஒருங்கிய இரண்டு உடற்கு உயிர் ஒன்று ஆயினார்
கருங்கடல்பள்ளியில் கலவி நீங்கப்போய்ப்
பிரிந்தவர்கூடினால் பேசல் வேண்டுமோ”

எங்கே வைக்கிறார் பாருங்கள். அதிலும் பாற்கடல் பள்ளி என்று சொல்லவில்லை. கருங்கடல் பள்ளி என்கிறார். அவன் தானே கண்ணன் ஆயிற்றே. கருமை வண்ணன் ஆயிற்றே. அவன் துயில் கொண்டால் பாற்கடலும் கருப்பாகாதா?  “கருமேனி செங்கண்மால்கண்படையுள் என்றும், திருமேனி நீ தீண்டப்பெற்று” என்று ஆழ்வார் பாடுவார். எதையும் எதையும் கம்பன் கொழுவிவிட்டார் பார்த்தீர்களா. ஜீனியஸ்.

vinnai_thandi_varuvaya53.jpg_320_320_0_9223372036854775000_0_1_0

இது கம்பரோடு முடியவில்லை. புகழேந்தி காதலை வைத்து ஒரு முழு இன்னிங்க்ஸ் அதுவும் நேரிசை வெண்பாவில். வீட்டில் செல்லம்மா சிவனே என்று இருக்க “தன் செயலெண்ணித் தவிப்பது தீர்ந்திங்கு நின் செயல் செய்து நிறைவு பெறும்வண்ணம்” என்று கண்ணமாவை பார்த்து பாடினான் பாரதி. hallucination. அதுவும் காதல் தான்.

Alas! I have nor hope nor health,
   Nor peace within nor calm around,
Nor that content surpassing wealth
   The sage in meditation found,
   And walked with inward glory crowned--
Nor fame, nor power, nor love, nor leisure.
   Others I see whom these surround--
Smiling they live, and call life pleasure;
To me that cup has been dealt in another measure.

என்பார் ஷெல்லி. அனுபவித்தால் மாத்திரமே புரியக்கூடியது. 

என்னுடைய கதைகளில் உஷ் .. இது கடவுள்கள் துயிலும் தேசம், சுந்தர காண்டம், மேகலா, வானம் மெல்ல கீழிறங்கி!, காடு திறந்து கிடக்கிறது, என்ர அம்மாளாச்சி! எல்லாம் இந்த ஆதாரமான காதல் உணர்ச்சிகளை பயன்படுத்தி சொல்லவந்த கருத்தை புகுத்த எடுத்த முயற்சிகள்.  இதில் முழுக்க முழுக்க காதல் மாத்திரமே தேங்கி நின்றது மேகலா வில் மாத்திரமே. சீக்கிரமே இன்னொன்று முயற்சி செய்யவேண்டும். A happy ending love story!

காதலர் தின ஸ்பெஷலாக ஒரு கவிதை எழுதி தர சொன்னான் கஜன். அதுவும் யோசிக்காம நோர்மலா வாசிச்சாலே புரியிறமாதிரி ப்ளீஸ் என்று கேட்டு அடிக்கோடிட்டான்! புரியாம எழுதினா தானே கவிதை? எதுக்கும் முயற்சி செய்கிறேன்.

சாலையோர தேநீர் கடை
கோடை மழை நாசி நெடி
தாவாரத்தில் இரண்டு கதிரை
நானிருக்க இழுத்துப்போட்டான்
ஏ ஆர் ரகுமான் பிடிக்கும் என்றான்.
samantha-and-nani-upcoming-tollywood-movie-yeto-vellipoyindi-manasuராஜா என்றான் சுஜாதா என்றான்.
ரசல் பீட்டர் டோம் ஹான்ஸ் என்றான்
ராஜபக்ஸ ஒரு ஷிட் என்றான்.
ராஸ்பெரி கொஃபி இரண்டு
நாக்கு புரள ஓர்டர் செய்தான்.
“70 பர்சன்ட் பொருத்தமாம்”
"இந்த பேரண்ட்ஸ் ஆர் சோ சில்லி”

என்று சொல்லி சிரித்தான்.
“நெடுஞ்சாலையிலே நனைய
ஒருவர் சம்மதமும் வேண்டாம்”  - என்று
மழையை பார்த்து கவிதை சொன்னான்.
“Enough is enough. “
“வா போய் நனைவோம்” என்றேன்.
“சட்டை நனைஞ்சு சளி பிடிக்கும், லேட்டர்” என்றான்
“போடா புளுகு மூட்டை”

&&&&&&&&&&

 

.


21 comments :

  1. by the way, காதல் பதிவு காதலுடன் எழுதப்பட்டிருக்கு போல. சுஜாதா பாணியில பின்னாலையே தெஸ்தொஸ்ரோனில இருந்து டோபமின் வாயிலா பயணிச்சு ஒக்டஸின் வரைக்கும் போனது சுவாரஸ்யம் தொய்யாமல் போனது பக்கா.

    'மறுகணம் வயிற்றுக்கும் தொண்டைக்கும் உருவமில்லா உருண்டை எல்லாம் ஓட தொடங்கியது' என்றது மாதிரியான வைரமுத்து டச், வாலி டச், கம்பன் டச், பாரதி டச் (அவ்வளவுதான் நமக்கு தெரியும், இங்கிலீஸ் போயம் எல்லாம் புரியாது பாஸ்) எல்லாம் ஓட்டத்துக்கு நல்லா இருக்கு.

    கவிதை நமக்கு விளங்கிற ரகம். இல்லாட்டால் புரியாது. நல்லாயிருக்கு.
    "“சட்டை நனைஞ்சு சளி பிடிக்கும், லேட்டர்” என்றான் " கனக்க நேரத்தில கனக்க விசயத்தில நானும் இப்படித்தான்.
    "இல்லாத மீசை துடிச்சு, இரத்தம் கொதிச்சு, பேஸ் முழக்கத்தோட" முடிஞ்சு போற டைப் தான்

    ஒவ்வொரு பதிவுக்கும் கமெண்ட் போட்டு கருத்து கந்தசாமியா கருத்து சொல்லணும் எண்டு பார்க்கிறன், இந்த பாழா போன பஞ்சிதான் விடுதில்லை. எப்பவும் காதல் இருந்தாலும் இன்டைக்கு ஸ்பெசலா ஐ லவ்வு யூ என்றுற மாதிரி. இன்டைக்காச்சும் நல்லா இருக்கு என்று கொமண்ட் போட்டு கடமையை முடித்து கொண்டு விடைபெறுகிறேன். நன்றி வணக்கமண்ணே. தொடர்ந்து எழுதுங்க.

    ReplyDelete
    Replies
    1. வாங்க Think Why Not?

      மிக்க நன்றி தலைவா ... நாங்க எப்பவுமே ஐ லவ் யூ சொல்ல .பின்னடிச்சதில்ல .. ஹ ஹா

      Delete
    2. BTW அந்த ஷெல்லி கவிதை ... "To me that cup has been dealt in another measure." என்ற இறுதிவரியை ஒருக்கா வாசிச்சிட்டு திரும்பவும் ஆரம்பத்தில் இருந்து வாசியுங்கள் வலி புரியும்.

      Delete
    3. அந்த வரியை முதலிலேயே கவனிச்சேன். அதில ஏதோ இருக்கு எண்டும் புரிஞ்சுது. ஆனா என்ன எண்டு தான் விளங்கேல. சரி விடுங்க பாஸ், நமக்கும் கண்ணதாசன், வாலி, வைரமுத்து விளங்கிறதே பெரிய விசயம். இதில ஷெல்லி மட்டும் உள்ளங்கை நெல்லிக்கனி ஆகிட போகுதா...? :P

      Delete
  2. Happy valentines day JK,Hope you enjoyed yesterday.................
    It is very difficult to prove that there is no தெய்வீக காதல் but all experienced people defend these as their love from Kamban to JK. There is something related to hormones and others as you said. love is alright then once it became family and other responsibilities..........................

    Ajanthan

    ReplyDelete
  3. //,Hope you enjoyed yesterday...//
    கடுப்பெத்தறார் மை லார்ட்!

    // love is alright then once it became family and other responsibilities//

    Exactly my point. But anyway all the feelings are driven by the combinations of different hormones, which makes one thinks his or her love is always precious and divine. That's the survival instinct developed over the evolution of the spices. We don't need to know it. Just need to experience it. Its life, not science end of the day.

    ReplyDelete
  4. காதல் என்று ஏதோ பிளக் அன்ட் வைற்'றில் ஏதோ ஞாபகம் வருது. கனக்க ஞாபகம் வரல்லை.

    ReplyDelete
  5. Hahaha.. Sirippai adakka mudiyella annai

    ReplyDelete
  6. JK;

    நீ ஒரு சிங்கனடா:)

    எதை தொட்டாலும் ரசித்து சொல்லுகிற திறமை இருக்கு..எத்தனை பாட்டுக்கள்/விடயங்களை ஞாபகம் வைத்திருக்கிறீர்கள்? -சைக்கில் கன்டிலில் உதயன் பேப்பர் படிக்கிறதை சொல்லுகிறேன்.

    நீங்கள் எங்களுக்காக ஒரு தொழில் முறை எழுத்தாளராக வர வேண்டும்,வருவீர்கள் .

    வாழ்த்துக்கள்

    கோபாலன்

    (அது காதல் எனும் போதை காட்டி விட்டதா/ கட்டி விட்டதா ...?)

    ReplyDelete
    Replies
    1. நன்றி கோபாலன் அண்ணே .. ஹாண்டிலில உதயன் நீங்களும் படிச்சிருக்கிறீங்கள் அப்பா .. அதெல்லாம் ஒரு காலமண்ணே..

      /கட்டி விட்டதா //
      எழுத்து பிழை கடைசில காட்டிவிட்டது!

      Delete
  7. So Serious JK :/
    சீக்கிரமே ஒரு பொண்ணை பாருங்கோ

    ReplyDelete
    Replies
    1. அடுத்ததா கடுப்பேத்த வந்திட்டாங்க மேடம் .. நல்லாருக்கு கதை..

      Delete
  8. கவுதம் மேனன் படம் மாதிரி இருக்கு பாஸ்

    ReplyDelete
  9. Geetha jeevan2/19/2013 8:37 pm

    “போடா புளுகு மூட்டை”.........
    Where is Mehala?????

    ReplyDelete
  10. WAITING FOR NEXT POST ANNA..... தினமும் புதிய பதிவு இருக்கின்றதா என்று பார்த்து ஏமாந்து போகின்றேன் ...

    ReplyDelete
    Replies
    1. Ah Thanks. Since the pressure of writing Kanthasamy nomore, I am taking a mini break. But viyaalamaatram will be tomorrow. :)

      Delete
    2. ah,,, today is thursdayyyyyyyyyyyyyyyyyyyy..................

      Delete
  11. மறுகணம் வயிற்றுக்கும் தொண்டைக்கும் உருவமில்லா உருண்டை எல்லாம் .....

    This line is from 1993 song. Unni Krishnan.


    Love is not a feeling but an ability. Very true.mmmmmm

    siva59s@yahoo.com

    ReplyDelete
    Replies
    1. நன்றி சிவா .. அந்த பாட்டு .. "என்னவளே அடி என்னவளே"

      Delete

இந்த பதிவின் நீட்சி தான் உங்கள் கருத்துகளும். தெரிவியுங்கள். வாசித்து மறுமொழியுடன் வெளியிடுகிறேன்.

அன்புடன்,
ஜேகே