நாவலோ நாவல் : கோட்டைப் பிரச்சனை

 

nieuhoff1

புங்கைதேவனை பறங்கியர் சிறைப் பிடித்துவிட்டனர். இம்முறை காட்டிக்கொடுத்தவன் சாவகசேனன். நல்லகாலம். நான் மட்டும் இல்லாதிருந்தால் புங்கைதேவன் செத்தே இருப்பான்.

யாழ்ப்பாணக் கோட்டையின் மத்தியில் உள்ள மைதானம். அதன் நடுவே புங்கைதேவன் சங்கிலியால் பிணைக்கப்பட்டு, தலைகுனிந்தபடி நிற்கிறான்.  அன்றைக்கு மைதானத்தைச் சுற்றி, யாழ்ப்பாணப் பட்டினமே குவிந்திருந்தது. விசேட விருந்தினருக்கென இரண்டு கொட்டகைகளைக் கொண்ட பார்வையாளர் மண்டபம் அமைக்கப்பட்டிருந்தது. அக்கம் பக்கத்துக் கோட்டைக் கொமாண்டர்கள், வைஸ் கொமாண்டர்கள், கப்பித்தான்கள், அவர்களின் மனைவிமார், பாதிரியார்கள் என்று ஒரு கொட்டகை வெள்ளைக்காரத் துரைமார்களால் நிரம்பியது. மற்றக்கொட்டகையில் வன்னிமைகள், முதலியார்கள், சிறாப்பர்கள் என உள்ளூர் துரைமார். சாவகசேனனுக்கு மூன்றாம் வரிசையில் இடம் ஒதுக்கப்பட்டிருந்தது. பாண்டு வாத்திய அணிவகுப்பு தயாராக நிற்கிறது. எல்லோரும் யாழ்ப்பாணக் கோட்டையின் கொமாண்டர் ரோட்ரிகோ டி சொய்சாவின் வரவுக்காக காத்திருக்கிறார்கள். 

புங்கைதேவன் மெதுவாக தலை நிமிர்த்தி, சுற்றிவர நோட்டம் விடுகிறான்.

“மரியா எங்கிருக்கிறாள்?”

jaffna mens at hollands era

புங்கைதேவன் யாழ்ப்பாண பட்டினத்திற்கு தெற்கே அமைந்திருக்கும் புங்குடுதீவைச் சேர்ந்தவன். பனங்கள்ளு இறக்குவதோடு, மற்றவர்களிடமும் கொள்வனவு செய்து கள்ளுத்தொழிலில் மொத்தவியாபாரம் செய்பவன். யாழ்ப்பாண கோட்டைக்கு கள்ளு விநியோகம் செய்யும் கொந்துராத்தையும் புங்கைதேவனே எடுத்திருந்தான். தினமும் மாலை வேளைகளில், ஐநூறு பைந்து கள்ளு. பத்து சரை எலுமிச்சம் ஊறுகாய் கோட்டைக்கு கொண்டு போகவேண்டும்.

புங்கைதேவன் காலையிலேயே கள்ளு இறக்கி, மூன்று பெரும் பானைகளில்  நிரப்பி, தோணியில் கொண்டுவந்து, பண்ணைக்கரையிலிருந்த வாடியில் கொஞ்சநேரம் இளைப்பாறி, பின்னர் வண்டில் கட்டிக் கொண்டு கோட்டை வாசலுக்குச் செல்வான். வாசலில் கிளியரன்ஸ் கிடைத்தவுடன் உள்ளே விடுவார்கள். அது வரைக்கும் பீடி பிடித்தபடியே ஏதாவது பாட்டை முணுமுணுப்பான்.

ஒருமுறை கோட்டைக்கொத்தளத்தில் மரியா டி சொய்சா காற்று வாங்கிக்கொண்டிருக்கும்போது தற்செயலாக புங்கைதேவனின் பாட்டு கேட்டது.

“மண்டைதீவு மணக்கரையில்
மாமன் மகள் உரசையிலே
புங்கைதீவில் அடிச்ச கள்ளு
புரைக்கு ஏறி நிக்குதடி.
நாகதீவு கள்ளி முள்ளு
வாடையிலே நெருங்கையிலே
குருமணலு கும்மியொண்டு
அடிவயித்தில் உருளுதடி”

புங்கைதேவன் பாட்டில் சுருதி, தாளம் எதுவும் இல்லாவிட்டாலும், அவன் குரலில் எப்போதும் ஒரு ஈரம் இருக்கும். அந்த ஈரத்தில் அக்கணமே மரியா மயங்கிவிட்டாள்.  யாரென்று பார்த்தாள். கறுப்புமேனி, வியர்வை, முறுக்குமீசை, பாடும்போது தாளம் தவறாமல் வெத்திலை எச்சி துப்பும் ஸ்டைல், கறைபடிந்த பற்கள். அவ்வளவுதான். யோசிக்கவேயில்லை.

மரியா டி சொய்சா புங்கைதேவனை அக்கணமே காதலிக்கத்தொடங்கிவிட்டாள்.

attributed_to_william_daniell_ra_girl_with_a_fishing_net_ceylon_d5723357h

அப்புறமென்ன. அடிக்கடி இருவரும் சந்திக்கலானார்கள். மொழிகளை தாண்டியதல்லவா காதல். இருவரும் எப்படியோ இருமொழித் திட்டம் இல்லாமலேயே தமக்கிடையே பேசிக்கொண்டனர். காதல் வளர்ந்தது.

இதிலே மரியா பற்றி நான் பெரிதாக இன்ரோ நான் கொடுக்காதற்கு இரண்டு காரணங்கள். ஒன்று தார்மீக நெறி.  அவள் அழகைப்பற்றிச் சொல்லுவதென்றால், கொஞ்சம் மேலே, கீழே, ஏற மாற சொல்லவேண்டும். அப்படிச் சொல்லுவது தமிழ் கலாச்சாரமல்ல. காரணம் மரியா யாழ்ப்பாணத்து கோட்டையின் கொமாண்டர் ரொட்ரிகோ டி சொய்சாவின் ஒரே மனைவி. இரண்டாவது காரணம், கேவலம் புங்கைதேவனுக்குப் போய் ஒரு வெள்ளைக்காரி மாட்டினதில் சாவகசேனனைப் போலவே எனக்கும் கொஞ்சம் கடுப்பு இருக்கவே செய்கிறது.

கொமாண்டர் டி சொய்சா யுத்தம், கப்பல் பிரயாணம், வரி வசூலிப்பு என்று எங்கேயாவது புறப்பட்டுவிட்டால், இதுதான் சான்ஸ் என்று மரியா புங்கைதேவனோடு எஸ்கேப்பாகிவிடுவாள். அனேகமாக கள்ளுக் கொண்டுவந்த பானைக்குள்ளேயே ஒளிந்துகொண்டு கோட்டையை விட்டு வெளியேறுவாள். கடற்கரையை எட்டியதும், வாடியில் இருவரும் ரெஸ்ற் எடுத்துவிட்டு, பின்னர் அசதி தீர குளித்துவிட்டு படகேறுவார்கள். புங்குடுதீவில் கோயில், குளம், திருவிழா என்று எல்லா இடமும் கூடித்திரிவார்கள். காதல் என்றால் அப்படி ஒரு காதல். ஒருநாள் டி சொய்சாவை விஷம் வைத்து கொன்றுவிட்டு மலபாருக்கு தப்பிப்போகவும் இருவரும் திட்டம் போட்டார்கள்.

இப்படித் ஜோடியாகத் திரியும்போதுதான் ஒருநாள் சாவகசேனனை கண்ணகி அம்மன் திருவிழாவில் புங்கைதேவன் கண்டான். சாவகசேனன் புங்கைதேவனிடம் கள்ளுக் கேட்டான். இவன், பக்கத்தில் வெள்ளைக்காரி நின்ற சுதியில், “வெள்ளைக்காரருக்கு மட்டுமே இனிநான் கள்ளுக்கொடுப்பேன்” என்றான். வெள்ளைக்காரி சாவகசேனன் யார்? என்று விசாரிக்க போர்த்துகீசத்தில் “புரூட்டு பைஸ்” என்று புங்கைதேவன் சொல்ல, கந்தோரில் வேலை செய்யும் சாவகசெனனுக்கு அது புரிந்துவிட்டது. உடனே சாவகசேனன் புங்கைதேவனின் சாதியை இழுக்க, பதிலுக்கு புங்கைதேவன் சாவகசேனனின் தாயை இழுக்க, கைகலப்பு ஏற்பட்டு, சாறம் கிழிய, மரியா அழ ஆரம்பிக்க, புங்கைத்தேவன் எல்லோரையும் ஒருநாள் கொல்வேன் என்று சொல்லியபடியே அங்கிருந்து வெளியேறினான்.

பிறகென்ன, அடுத்தநாள் பொழுதுவிடிய முன்னமேயே சாவகசேனன் யாழ்ப்பாணக் கோட்டைக்குப் போய், கப்பித்தானிடம் போட்டுக்கொடுத்தான். விஷயம் கொமாண்டருக்குப் போனது.  பின்னேரம் கள்ளு வண்டில் வரும்போது டி சொய்சா கோட்டை வாசலில் நிற்கிறார். மூன்றாவது பானை உடையும்போது மரியா கள்ளூர வெளியே வந்தாள். டி சொய்சாவைக் கண்டதும் அலறிக்கொண்டே அவனைப்போய் கட்டிப்பிடித்தாள். புங்கைத்தேவனை சிறையில் அடைத்தார்கள்.

அடுத்தநாளே புங்கைத்தேவனுக்கு மரணதண்டனை விதிக்கவென்று விசாரணை ஆரம்பித்தது. புங்கைத்தேவன் சார்பாக வாதிட சிறாப்பர் சின்னதுரை ஏற்பாடு செய்யப்பட்டார். விசாரணை சிம்பிளாக நடைபெற்றது. நீதிபதியாக மரியாவின் கணவன் கொமாண்டர் டி சொய்சாவே செயற்பட்டான். கண்ணு சிவந்திருந்தான்.

"மன்னிக்கமுடியாத சட்ட விரோத குற்றத்தை விசாரிக்கப் போகிறேன்"

சிறாப்பர் சால்வையை விசிரியபடி எழுந்தார்.

"எது மன்னிக்கமுடியாத சட்டவிரோத குற்றம் கொமாந்தர் அவர்களே?"
"வெள்ளைக்காரியை ஒரு சுதேசி காதலித்தது"
"காதலித்தது தப்பா?"
"அதற்கு சட்டத்தில் இடமில்லை"
"ஆனால் பறங்கியர் எங்கள் இனத்தவரை பெண்டாடுகிறார்களே”
"அவர்களுக்கு இந்த நாட்டு சட்டம் செல்லாது சின்னதுர"
"யாழ்ப்பாண சட்டத்தில் காதலிப்பது குற்றமல்லவே"
"காதலிப்பது குற்றமில்லை … ஆனால் சாதி விட்டு சாதி காதலிப்பது குற்றமே..  வெள்ளாளர் இன பெண்களை காதலித்ததால் நீங்கள் எத்தனை பேரை கழுவேற்றினீர்கள் .. நாங்கள் கேட்டோமா?"

சிறாப்பருக்கு இதற்கு எப்படி பதில் வாதம் வைப்பது? எனறு தெரியவில்லை. ஒரு புங்கைதேவனுக்காக யாழ்ப்பாண சாதிய அமைப்பை தியாகம் செய்யவும் அவர் தயாராக இல்லை. அமைதியாக இருந்தார். அவருக்கு வந்தவேலை முடிந்துவிட்டது.

"தண்டனை இதுதான். இங்கே இரண்டு மூடிய கொத்தளங்கள் இருக்கின்றன. நாளைக்கு இங்கே ஒன்றுக்குள் கொடிய சிங்கம் கொண்டுவரப்படும். மற்றொன்றுக்குள் ஒரு அடிமைப்பெண் இருப்பாள். எது எதற்குள் என்று கொத்தளங்களை திறக்காதவரைக்கும் கண்டுபிடிக்கமுடியாது. புங்கைதேவன் சிங்கக்கொத்தளத்துக்குள் சென்றால் அவனை சிங்கம் அடித்துச் சாப்பிட்டுவிடும். மற்றதுக்குள் சென்றால், அவன் உயிர்தப்புவான். ஆனால் அதற்குள் இருக்கும் அடிமைப்பெண்ணையே அவன் திருமணம் செய்யவேண்டும்"

"வேண்டாம் .. வேண்டாம் .. என்னை இந்த இடத்திலேயே கொன்று விடுங்கள். எனக்கு இரண்டுமே மரணதண்டனைதான். ஒரு அடிமை எனக்கு மனைவியாவதா? என்னால் மரியாவை மறக்க முடியாது ... "

இப்படி நேற்று அலறிய புங்கைதேவன் இரவோடு இரவாக ஒரு தீர்மானத்துக்கு வந்திருந்தான். வெள்ளைக்காரி என்ன வெள்ளைக்காரி. அவளை காதலிக்கலாம். வச்சு குடும்பம் நடத்த முடியுமா? அடிமைப்பெண்ணே மேல். எப்படியாவது அடிமைப்பெண் இருக்கின்ற கொத்தளத்தை அறிந்துவிட்டால், அதற்குள் போய் அவளை திருமணம் முடித்து புங்குடுதீவோடு செட்டில் ஆகிவிடலாம். மரியாவும் வேண்டாம். சொரியாவும் வேண்டாம்”. தனக்கு எப்படியாவது அடிமைப்பெண் இருக்கின்ற கொத்தளத்தை அடையாளம் காட்டும்படி, காவலுக்கு நின்ற தன் ஊர்க்காரனிடம் மரியாவுக்கு செய்தி அனுப்பினான். “காலைக்குள் கண்டுபிடித்துச் சொல்லுவதாக” மரியாவிடமிருந்து செய்தி வந்தது.

“மரியா எங்கிருக்கிறாள்?”

மைதானத்தின் நடுவே நின்ற புங்கைதேவன் மெதுவாக தலை நிமிர்த்தி, சுற்றிவர நோட்டம் விடுகிறான்.

கோட்டை பாங்கு, கொமாண்டர் டி சொய்சா வருகிறான் என்பதை பறை சாற்றி ஊதப்பட்டது. பாண்டுகள் அதிர்ந்தன. எல்லோரும் எழுந்து நின்றார்கள். டி சொய்சா கம்பீரமாக நடந்துவர, பக்கத்திலேயே கைகோர்த்தபடி மரியா.

புங்கைதேவன் கண்டுவிட்டான். நேற்று அழுது முகம்சிவந்து கிடந்த மரியாவா இவள்? இன்றைக்கு முகம் முழுக்க சிரித்தாள்.  ஒரு இரவு, ஒரு நிலவு, சொங்கி சொய்சாவிடம் மயங்கிவிட்டாளே. மினுக்க மினுக்க உடுத்தி, வெள்ளைத்தொப்பி, லிப்ஸ்டிக், கழுத்து, இறங்கிய கவுண் என்று கவர்ச்சி கதிகலங்கியது. புங்கைதேவன் தான் உயிர்தப்பினால் அடிமைப்பெண்ணை மணந்துவிட்டு, முதல்வேலையாக சாவகசேனனை போடவேண்டுமென சூளுரைத்தான்.

டி சொய்சாவும் மரியாவும் பெருமிதத்தோடு முன் ஆசனங்களில் வந்தமர்ந்தார்கள்.

“எங்கே .. கொத்தளங்களுக்கு அருகே இவனை இழுத்துச்சென்று கட்டை அவிழ்த்துவிடுங்கள். அவன் விதியை கண்டு ரசிப்போம்”

சொய்சா சொல்ல, புங்கைதேவன் மரியாவையே பார்த்தான். அவள் கண் ஒரு கணம், ஒரேயொரு கணம் புங்கைதேவனின் கண்களை சந்தித்தது. பின்னர் அவள் தலை குனிந்தது. அப்போது அவளுடைய கைகளைக் கவனித்தான். அட அவள் கை இடப்பக்கத்தை சுட்டிக்கொண்டிருந்தது. பதில் கிடைத்துவிட்டது. இடதுபக்க கொத்தளம்தான். அங்கேதான் பணிப்பெண் இருக்கிறாள். மரியா, என் அன்பே. உனக்கு கோடானுகோடி நன்றிகள். நம்பிக்கையோடு இடது பக்க கொத்தளத்தை நோக்கி புங்கைதேவன் நடக்க ஆரம்பித்தான்.

“மிஸ்டர் புங்கைதேவன் .. எக்ஸ்கியூஸ் மீ”

நான்தான். அவனை தடுத்து நிறுத்தினேன். அவன் என்னை நூதனமாக பார்த்தான்.

“யார் நீ?”

“நான் ஜேகே ..”

“போர்த்துக்கேயனா?”

“நான் .. வந்து .. நாவலோ நாவல் எண்டு .. அத விடுங்க .. இப்ப நீங்க என்ன முடிவு எடுத்திருக்கிறீங்கள்?”

புங்கைதேவன் கொஞ்சம் தயங்கினான். என்னை நம்பலாமா என்று யோசிக்கிறான்.

“இடப்பக்கம் உள்ள கொத்தளத்தில் அடிமைப்பெண் இருக்கிறாள். அவளைக் கலியாணம் கட்டி செட்டிலாகப் போகிறேன்”

“இடப்பக்கம் உள்ள கொத்தளத்தில்தான் அடிமைப்பெண் இருக்கிறாள் எண்டு எப்பிடி சொல்லுறீங்கள்?”

“அப்பிடித்தான் மரியா சொல்லியிருக்கிறாள். மரியா சொன்னா சரியா இருக்கும். அவள் ஏமாத்த மாட்டாள்”

“எப்பிடி சொல்லுறீங்கள்?’

“ஏனெண்டா அவ எண்ட காதலி … வாடிவீடு, கோயில்.. துரவு .. தோப்பு எண்டு .. காதலிச்சிருக்கிறம்… என்னை ஏமாத்தமாட்டன் எண்டு சொல்லியிருக்கிறா ..எண்டபடியா அவள் சொன்னா சரியாத்தான் இருக்கும்”

“திருப்பி திருப்பி ஒண்டையே சொல்லுறீங்க புங்கைதேவன்.. Circular Reasoning தெரியுமா? மரியா சொன்னா சரியா இருக்கும். அவள் என்னை எமாத்தமாட்டன் எண்டு சொல்லியிருக்கிறா. எண்டபடியா ஏமாத்தமாட்டா… இப்பிடி சொல்லுறது அபத்தமா இல்லையா? எல்லாத்தையும் அவள்தானே சொன்னா? ஒருவேளை அவ சொல்லுறது பொய்யா இருந்தா? … என்னத்துக்கு வேலை இன்டர்வியூவில ரெப்ரீ கேக்கிறவை? ஒரு முடிவை ஆரம்ப புள்ளியா வச்சிட்டு பின்னர் அதையே காரணமாக்கினா? … அவன் நல்லவன் .. ஏனெண்டா அவன் கெட்டவனில்ல.. ரெண்டும் ஒண்டுதானே? அர்த்தமற்ற வாதம்”

புங்கைதேவன் சிறிது யோசித்தான்.திடீரென்று அவன் முகம் பளிச்சிட்டது.

“சே கே  நம்பிக்கை முக்கியம் … கடவுளை நம்பினோர் கைவிடப்படார் எண்டு கடவுள்தானே சொன்னார். பகவத்கீதையில் நானே பரம்பொருள் என்று கிருஷ்ணர் சொன்னாரே .. நம்புகிறோமே. ஏனெண்டா கடவுள் சொன்னா எப்பவுமே சரியாகத்தான் இருக்கும்? நாத்திகர்கள்கூட கடவுளே வந்து ‘நான் தான் கடவுள்’ என்று சொன்னால்தான்  இந்த ஊரில நம்புவினம்”

“அது இன்னொரு வகை Circular Reasoning புங்கைதேவன் .. அத விடுங்க ..  கடவுள் சொன்னா சரியா இருக்குமென்று யார் உங்களுக்கு சொன்னது?”

“யாரா? முதலில கடவுள் கொஞ்ச பேருக்கு சொன்னார்.. அவையள் மிச்ச ஆக்களுக்கு சொல்ல, மிச்ச ஆக்கள் .. இப்பிடி .. எல்லாரும் சொல்லுறினம் ..”

“Appeal to bandwagon ..திரும்பவும் fallacy .. தப்புமேல தப்பு பண்ணுறீங்க புங்கைதேவன்..  ஒரு நாட்டிண்ட பெரும்பான்மை மக்கள் ஒருத்தனுக்கு வாக்களிக்கிறார்கள் என்பதற்காக அவன் சிறந்த தலைவனாகிடுவானா? நாலு சாமியார்கள் கடவுளைக் கண்டன் எண்டு சொன்னா, கடவுள் இருக்கிறது உண்மையாகிடுமா? ”

“ஆனா கம்பர் வள்ளுவர் எல்லாம் சொல்லியிருக்கிறினமே”

“Appeal to Authority .. ஒருவர் பெரியவர் எண்டதுக்காகவே அவர் சொல்லுறது சரியாக இருக்கோனுமெண்டதில்ல. யோசிச்சுப்பாருங்க .. எங்கட சமகால வாழ்க்கையில எந்த தவறும் விடாத ஒரு மனிதனை கண்டதுண்டா? இல்ல. அப்படி எண்டால் கம்பரும் வள்ளுவரும் மட்டுமே எல்லாமே சரியா சொல்லுவாங்கள் எண்டு எப்பிடி தீர்மானிக்கிறீங்கள்? என்ன நடக்குதெண்டா, முதலில் அவர்கள் சொன்ன நல்லவிஷயங்களை சொல்லி, பின்னர் அவர்கள் என்ன சொன்னாலும் சரியாகத்தான் இருக்கும் என்று சொல்லி, பின்னர் அவர்கள் விட்ட தவறுகளையும் நாங்கள் வக்காளத்து வாங்க ஆரம்பித்துவிடுகிறோம்”

407166_256725091065216_100001831803283_648956_560693518_n
“விளங்கேல்ல’

“கம்பர் .. சொல்லாத நல்ல கருத்துகள் இல்ல .. பிறன்மனை நயவாமை, ஒருவனுக்கு ஒருத்தி. ஒழுக்கம், மெய்யுடைமை என்று வள்ளுவர் சொன்னதெல்லாம் அவர் சுவாரசியமாக கதையா எழுதியிருக்கிறார். அதனால் கம்பர் ஒரு பெருங்கவிஞரே .. ஆனால் கம்பரும் ராமன் சீதையை சந்தேகித்தல், முதற்கொண்டு வாலியை ஒளிந்திருந்து அம்பெய்துவது வரை பல இடங்களில் சறுக்கியிருக்கிறார். நாங்கள் கம்பர் சொல்லுவதெல்லாம் சரி என்று நினைச்சு, அவர் செய்த தவறுகளையும் நிரூபிக்க முனைகிறோம். இது Appeal to Authority”. பார்ப்பான் பிறப்பொழுக்கம் குன்றக்கெடும் என்று வள்ளுவர் சொல்லுவதும் அந்தவகையே

download“அடங்கொப்புறானை ”

“ஆனா நாங்க இப்படி பெரியாக்களை கண் மூடி ஏற்றுக்கொள்ளுறதாலேயே முரளிதரன் இலங்கை யுத்தத்தில் யாருமே காணாமல் போகவில்லை என்று சொல்லமுடிகிறது. அப்துல்கலாமை வச்சு அரசாங்கம் மும்மொழித் திட்டத்தை அறிமுகப்படுத்துது. விளங்குதா?”

“ஒரு அறுப்பும் விளங்க இல்லை”

“அது உங்களுக்கில்ல புங்கைத்தேவன்.. உந்த சிறாப்பர் சின்னதுர இருக்கிறாரே ..அவரும் ஒருவிதத்தில் முரளிதரன்தான்”

“அவர் .கணக்குப்பிள்ளை . எனக்காக வாதிட்டவர் .. நல்ல மனுஷன்.. சொன்னா சரியா இருக்கும்..”

“ஆனால் சிறாப்பருக்கும் சட்டத்துக்கும் என்ன சம்பந்தம்? அவர் ஏன் உங்களுக்காக வாதிடவந்தவர்?”

“ஏனெண்டா என்னை விடுவிக்கோணுமெண்டு…”

“இல்லை புங்கைதேவா .. அவர் நினைத்திருந்தா வாதிட்டிருக்கலாம். பறங்கியர் யாழ்ப்பாண பெண்களை வற்புறுத்தி பெண்டாளும்போது, யாழ்ப்பாண ஆண்கள் வெள்ளைக்காரிகளை கட்டினா என்ன தப்பு?”

“அதுக்குத்தானே சட்டம் செல்லாது எண்டு சொன்னாங்கள்”

“அது பம்மாத்து .. ஆங்கிலத்தில “True Scotsman” எண்டு சொல்லுறது. முதலில ஒரு விதியை தமக்கு சார்ப்பாக முன்வைக்கிறது. அது மற்றவனுக்கும் சார்பா வருதெண்டா, உடனே விதியை கொஞ்சம் மாற்றி அமைக்கிறது”

“விளங்கேல்ல செகே ..  இந்த இடத்தில எனக்கு இந்த விளக்கம் தேவையா? சீவனே போகப்போகுது”

“இதிலதான் சொல்லோணும் புங்கைதேவா .. சண்டை பிடிக்க எல்லோரும் வெயிட் பண்ணிக்கொண்டிருக்கேக்கத்தானே கிருஷ்ணர் பகவத்கீதை ஓதினவர்”

“ங்கே?”

“உதாரணத்துக்கு … Animal Farm நாவலில .. முதலில் “All animals are equal” எண்டு பன்றிகள் எழுதினது. பிறகு அத கொஞ்சம் தமக்கு சார்பாக மாத்த, “All animals are equal, but some are more than equal” என்று விதியை திருத்தி எழுதிச்சு .. அதமாதிரித்தான் முதலில வெள்ளை இனத்த சுதேசி காதலிக்கிறது தப்பென்றவர்கள், பிறகு அது தமக்கு எதிராக திரும்பியதுடன், கதையை கொஞ்சம் மாற்றி, சட்டம் சுதேசிகளுக்கு மட்டுமே செல்லும் என்று மாற்றிவிட்டார்கள். இது தப்பாட்டம். ஆனா சின்னதுரை இதைப்பற்றி மூச்சு விடேல்ல”

“ஆனா அவர் எனக்காக குரல் கொடுத்தாரே”

“இல்ல புங்கைதேவா … அவர் போர்த்துக்கேயர் கொடுத்த காசுக்கு ஓமெண்டு பேச வந்தவர். சட்டம் தெரியாட்டியும், சமூகத்தில நல்ல மதிப்பிருக்கிறதால அவரிண்ட பேச்சு எடுபடுமெண்டு அவரை பறங்கி காசு குடுத்து கூட்டி வந்திட்டுது… பறங்கிக்கு நடுநிலைமையாளன் எண்ட பெயரும் கிடைச்சிட்டுது..”

புங்கைதேவன் நான் கொடுத்த விளக்கத்தில் குழம்பிவிட்டான்.

“சரி அத விடுங்க.. மரியா ஏன் எனக்கு பொய் சொல்லோணும்?”

“யோசிச்சுப்பாருங்க.. நேத்துவரைக்கும் அழுத மரியா, இண்டைக்கு புதுசா கலியாணம் கட்டினமாதிரி களையோட வந்து நிக்கு”

“அப்படீண்டா?”

“நேத்திரவு கொமண்டருக்கும் மரியாவுக்கும் ரொமான்ஸ் நடந்திருக்கு … ”

“ஆ?”

“கொமாண்டர் மரியாவை திரும்பவும் கவுத்துட்டான் .. இப்போதைய நிலைமைல மரியாவுக்கு நீ உயிரோட இருக்கிறது நல்லதில்ல. யோசிச்சுப்பார், உன்னோட இருக்கும்போது டி சொய்சாவை கொலை செய்யத் திட்டம் போட்டாளே..”

“அட .. அப்படி எண்டால், இப்ப பறங்கியோட மீண்டும் சேர்ந்துட்டு, என்னை சாகடிக்கப்போகிறாளா?”

“சொல்ல முடியாது … அப்போது பறங்கி உயிரோட இருக்கும்வரைக்கும் நீங்கள் தப்பமுடியாது எண்ட நிலை. இப்போது நீங்க உயிரோடு இருக்கிறதால எந்தப்பிரச்சனையும் இல்ல...”

“குழப்புறீங்கள்?”

“உனக்குத்தான் தெரியோணும் .. மரியா சிலவேளைகளில் நடிக்கலாம் .. எப்படியாவது உங்களைக்காப்பாற்றிவிட்டால் பின்னர் அப்படி இப்படி பழைய தொடர்பை தொடரலாம் எண்டும் நினைக்கலாம்தானே”

புங்கைதேவனுக்கு கொஞ்சம் சபலம் தட்டியது.

“எண்ட மரியா என்னை மெய்யாலும் காதலிச்சவா..”

“அப்படி காதலிச்சவள், நீங்க அவளிண்ட பணிப்பெண்ணையே திருமணம் முடிக்கிறதா ஏற்றுக்கொள்வாளா? .. பொறாமை லேசுப்பட்ட விஷயம் இல்ல புங்கைதேவா”

“ஆனா அப்படி காதலிச்சவள் தன் காதலன் புலியிடம் அடிப்பட்டு சாகிறத பார்க்க வந்திருப்பாளா? .. அதவும் சிரிச்சுக்கொண்டு..”

இப்போது நானும் குழம்பினேன்.

“என்ன சே .. கே .. எனக்கு இவ்வளவு விளக்கம் சொன்னீங்கள் .. ஒரு முடிவு கொடுக்கமாட்டீர்களா?”

நான் தயங்கி தயங்கி சொன்னேன்.

“புங்கைதேவா .. ஒரு விஷயத்துக்கு விளக்கம் கொடுக்கிறது ஈஸி .. ஆனா சீர்தூக்கிப் பார்த்து முடிவு எடுக்கிறது கஷ்டம். அதுவும் உயிர்போற விஷயத்தில, தத்துவ விளக்கம் பார்த்தா எந்த முடிவும் எடுக்க ஏலாது .. தவிரவும் சிறுகதைக்கு எழுத்தாளரே முடிவை சொல்லக்கூடாது!”

பளார் என்று அறை விழுந்தது.

“அப்ப என்ன .. மண்ணுக்கடா இடையில மறிச்சு இவ்வளவு பீலா விட்டனி .. விட்டிருந்தா நானே போய் எதிலாவது மாட்டியிருப்பன் .. இப்ப என்னையும் குழப்பி விட்டிட்டாய்.”

 

புங்கைதேவன் ஒரு தீர்மானத்துக்கு வந்தவனாய் திரும்பிப்பார்க்காமல் கொத்தளங்களை நோக்கி நடக்க ஆரம்பித்தான். மொத்த மைதானமுமே அவனை பதட்டத்தோடு பார்த்துக்கொண்டிருந்தது. கதையை முடிக்கும்முன்னம் நான் மீண்டுமொருமுறை மரியா டீ சொய்சாவின் கைகளை கவனித்தேன்.

அவள் கை இப்போது வலப்பக்கம் சுட்டிக்கொண்டிருந்தது.

images

 

*********************


இந்தக்கதையில் பயன்படுத்தப்பட்ட தப்பான வாதங்கள் (fallacies).

1) Circular Reasoning ( Begging the question)
2) Appeal to Bandwagon.
3) Appeal to Authority.
4) True Scotsman.
5) 1882ம் ஆண்டு ஸ்டோக்கோன் என்பவரால் எழுதப்பட்ட “The Lady and The Tiger” என்ற சிறுகதையின் சில துணுக்குகள் இந்தக்கதையில் பயன்படுத்தப்பட்டிருக்கிறது.


நாவலோ நாவல் : ஏழு நாட்கள், ஏழு கதைகள்
நாவலோ நாவல் : நமசிவாயமும் சூரியனும்
நாவலோ நாவல் : சிவகாமியின் கண்ணீர்
நாவலோ நாவல் : கந்தரோடை கலகம்
நாவலோ நாவல் : குண்டர் கூட்டம்

மீண்டும் நாளை மறுதினம் தொடரும்.


6 comments :

  1. எங்கடா முடிவு என்று வாசகர்களை அங்கலாய்க்க வைப்பதில் இருக்கிறது எழுத்தின் வெற்றி.. சுவாரசியமாக கதை சொல்லி நடத்தி செல்லுகையில் புதிய விடயங்களையும் வாழைப்பழத்தில் ஊசி அறிமுகபடுத்தி வைக்க முயற்சிப்பது சுஜாதா ஸ்டைல் சமூக அக்கறை. தொடர்ச்சியா கலக்கிறீங்க தல..

    ReplyDelete
    Replies
    1. நன்றி துஷி. வாசிச்சு கருத்து தெரிவித்தமைக்கு.

      Delete
  2. பண்டய தமிழுக்கும் இண்டய தமிழுக்கும் நகைசுவையில் முடிச்சுபோட உங்களைவிட்டா ஆளே இல்ல செகே!
    என்னைக்கேட்டா புங்கைதேவன் எதுக்கை போயிருந்தாலும் இப்போ உயிரோட இருக்கமாட்டான்!
    Uthayan

    ReplyDelete
    Replies
    1. நன்றி உதயன் அண்ணே.
      //புங்கைதீவன் உயிரோட இருக்கமாட்டான்//
      உங்கட மூளையும் கொமாண்டர் மாதிரியே வேலை செய்யுது அண்ணே.

      Delete
  3. சனி ஞாயிறு லீவு விட்டிட்டியள். நேற்றிலிருந்து படலேக்கையே சுத்திச் சுத்தி வந்தன். திறக்கிற மாதிரி தெரியேல்லை.என்ன ஜெ .கே. ஒரு நாள் லேட் ஆக்கிப் போட்டீங்கள்! Vimal

    ReplyDelete
    Replies
    1. நன்றி விமல் ... எழுதினாலும் சிலவேளை திருப்தி வராட்டி நோண்டிக்கொண்டு இருக்கிறதால லேட்டாகிறது. வியாழக்கிழமை மற்றது வரும்.

      Delete

இந்த பதிவின் நீட்சி தான் உங்கள் கருத்துகளும். தெரிவியுங்கள். வாசித்து மறுமொழியுடன் வெளியிடுகிறேன்.

அன்புடன்,
ஜேகே