லிங்கா


Rajinikath-in-Lingaa-Movie

 

91ம் ஆண்டு.

தீபாவளிக்கு இன்னமும் ஒரு மாதமே இருக்கிறது. அப்போது ரஜினி “காலம் மாறிப்போச்சு” என்று ஒரு படம் நடித்துக்கொண்டிருக்கிறார். ஏதோ ஒரு காரணத்தால் படத்தைத் தொடர முடியவில்லை. தீபாவளி நெருங்குகிறது. “தலீவா உன் படம் வேணும்” என்று ரசிகர்கள் ரஜினி வீட்டுக்கு முன்னால் நின்று ஆர்ப்பாட்டமே செய்கிறார்கள். ரஜினி உடனேயே கன்னடப் படமான தேவா கதையை ரீமேக் பண்ண முடிவெடுத்து ராஜசேகரை இயக்குனராகப் போட்டு நடிக்கிறார். வழமையான, தம்பிமாருக்கு உருகும் அண்ணன், அந்தத் தம்பிமாராலேயே  ஏமாற்றப்பட்டு, எல்லாவற்றையும் இழந்து, பின் மீள எழும் டெம்ப்ளேட் கதை. “மாசி மாசம் ஆளான பொண்ணு”, “சந்தைக்கு வந்த கிளி” என்று பல இளையராஜா ஹிட்டுகள். ஒரே மாதத்தில் மொத்தப்படமும் எடுக்கப்பட்டு தீபாவளியன்று படம் வெளியாகிறது. தர்மதுரை! அந்தப்படம் ரஜனி ரசிகர்களுக்கு செம மீல்ஸ். மற்றவர்களுக்கு சாதாரணம்.

லிங்கா, ரஜனி நமக்குத் தந்திருக்கும் இன்னொரு தர்மதுரை.

ஆற்று அணையை இன்ஸ்பெக்ட் பண்ணவந்திருக்கும் எஞ்சினியரான பொன்வண்ணன் உள்ளூர் எம்.பியின் கூட்டத்தால் கொல்லப்படுவதிலிருந்து படம் ஆரம்பிக்கிறது. சாகும் தறுவாயில், இந்த அணையைக் காப்பாற்றவேண்டுமென்றால் பூட்டப்பட்டுக்கிடக்கும் ஊர்க் கோயிலை திறக்கவேண்டுமேன்று அந்த எஞ்சினியர் ஊர்த்தலைவரிடம் சொல்லிவிட்டு இறந்துபோகிறார்.

டேய் இதெல்லாம் ஒகே, நம்ம தலைவன் எங்கேடா?

பொறுங்க பாஸ்… இன்னும் அஞ்சு நிமிஷம்தான்

ஊர்க்கோயிலை திறப்பதற்கு அந்தக் கோயிலைக் கட்டிய ராஜா லிங்கேஸ்வரனின் வாரிசு வந்தால்தான் முடியும் என்று ஊர்த்தலைவர் சொல்ல, ஊரே அந்த வாரிசைத் தேடி அலைகிறது. யார் அந்த வாரிசு?

“தலீவா …..”

பிரமாண்ட வெளிநாட்டு செட். விதம் விதமான சொகுசு கார்கள். பில்ட் அப் எகிற, தியேட்டரில் விசில் பறக்க செம ஸ்டைலாக ரஜினியின் இன்ட்ரோ. “ஓ நண்பா நண்பா” பாட்டு.  நவீன இன்டோர் செட்டுகளில் ஸ்டைலான ரஜினியின் டான்ஸ். என்னதான் இருந்தாலும் “ஒருவன் ஒருவன் முதலாளியும்”,”ஆட்டோக்காரனும்”, “வந்தேண்டா பால்காரனும்”, ஏன், சரவச்சட்டியை கவிட்டுப்போட்டு ஆடிய “அதாண்டா இதாண்டா” வும் கொடுத்த அந்த நேட்டிவிட்டி எபக்ட், மிகப் பிரமாண்டமான இந்த ஓபனிங் பாடலில் இல்லை. ரகுமான் வேறு, ட்ராக்கைக் கொடுத்துவிட்டு அதற்குப் பிறகு பாட்டை மெருகூட்டவே மறந்துபோனார் என்று தெரிகிறது. ஏன் பாஸ்? ஆனானப்பட்ட எஸ்.ஜே.சூர்யாவுக்கே “ஆறரைக்கோடி பேர்களில் ஒருத்தன்” என்று பாடிவிட்டு, ரஜினிக்குப் போய் வெறும் கீபோர்டில அடிச்சுக் கொடுத்திருக்கிறீங்க?

தப்பாட்டம் சாரே!

பாட்டு முடிகையில், ரஜினி இருந்த இடம் ஜெயில். எல்லாமே கனவுதான். நிஜத்தில் தல திருடன். கூடவே சந்தானம், பாலாஜி என்று ஒரு திருடர் கூட்டம். பிரமானந்தம் அண்ட் கோவின் போலீஸ் ஸ்டேஷன். ரஜனி அண்டர்ப்ளே பண்ண, கூடவிருந்து சந்தானம் அடிக்கும் லூட்டி செம்ம. ஜெயிலில் இருந்து இவர்களை மீட்டுப்போக அனுஷ்கா வருகிறார். அடுத்த அரை மணிநேரம்  ரஜனி, சந்தானம், அனுஷ்கா, மதன்பாப் என்று ஒரு கூட்டமே சேர்ந்து சிரிப்பில் தியேட்டரை அதிர வைக்கிறது. இடையில் அனுஷ்காவுக்கு ரஜினிமீது காதலும் வர, படத்தின் ஹைலைட் சோங் “மோனா மோனா” வருகிறது. இந்தப்பாட்டுக்காகவே படத்தைப்பார்க்கலாம். டிப்பிக்கல் ரஜினி ஸ்டைல், மானரிசங்கள், டான்ஸ் என்று தல பின்னிப்பெடல் எடுத்திருக்கும் பாடல். அப்படியே நைசாக நடந்து கையை ஒருபுறத்தில் ஊன்றிக்கொண்டு அனுஷ்காவைப் பார்க்கும் ஒரு சீன் இருக்கிறது. ஐயோடா. அனுஷ்காவால் ரஜினியின் இந்த ஸ்க்ரீன் பிரசென்ஸுக்கு ஈடு கொடுக்கமுடியவில்லை. ஆளும் ஒரு சுற்றுப் பருத்து, கன்னம் உப்பி கொழுக் மொழுக்கென்று வயதானாற்போல் தெரிகிறார். அவர் இனி விஜய், அஜித், சிம்பு, தனுஷ் கொஷ்டிக்குத்தான் சரி. நம்ம தலைவரின் யூத்து லுக்குக்கும் ஸ்டெப்புக்கும் அனுஷ்கா .. ம்ஹூம் .. செல்லாது.

அடுத்தபடத்தில் வி வோண்ட் சமந்தா!

1416143728rajinikanth-lingaa1

அனுஷ்கா எப்படியோ ரஜினியை அழைத்துக்கொண்டு அந்த அணை உள்ள ஊருக்குப்போக, அங்கே ஊர்ப்பெரியவரால் பிளாஷ் பக் சொல்லப்படுகிறது. படம்1939ம் ஆண்டுக்கு நகருகிறது. ஓடும் ரயிலில் நடக்கும் படத்தின் முதல் பைட் சீன். ரசித்து, ரசித்து பண்ணப்பட்டிருக்கும் நேர்த்தியான சண்டைக்காட்சியது. எல்லோருக்கும் பிடிக்கும்.

ரஜினி பிரிட்டிஷ் அரசாங்கத்தில் பணிபுரியும் கலக்டர். தண்ணீர்ப் பஞ்சம் உள்ள ஒரு ஊருக்கு எப்படி தன் செல்வத்தையும் அறிவையும் பயன்படுத்தி அணை கட்டிக்கொடுக்கிறார். வெள்ளைக்காரரோடு ஏன் முரண்படுகிறார். சோனாலி சின்ஹா எப்படி ரஜனிமேல் காதல் வயப்பட்டு டூயட் பாடுகிறார். ரஜினி எப்படி ஊர் மக்களால் ஏமாற்றப்படுகிறார். விடுகதையா லைக் சோகக் காட்சி ஒன்று. தன் சகலதையும் இழந்து, ஊர்மக்களால் துரத்தப்பட்டு இறுதியில் சமையல்காரர் ஆகும் ரஜினி என்பதோடு பிளாஷ்பக் முடிகிறது. நிகழ்காலத்தில் தற்போது அணைக்கு வில்லன்களால் ஆபத்து. அதை எப்படி அந்த திருடன் ரஜினி காப்பாற்றுகிறார் என்று … அடப்போங்கப்பா கதையா முக்கியம்.

படமாகப் பார்த்தால் லிங்கா சாதாரண படமே. இயல்புகளைத் தொலைத்த, ரஜினியைத் தவிர வேறு எந்தக் கொம்பன் நடித்திருந்தாலும் மரண மொக்கையாகப் போயிருக்கக்கூடியப் படம். ஆனால் நடித்தது ரஜினி. கதை எப்படி, மொக்கையா, சக்கையா என்று எவன் சீந்தினான். ரஜினி படத்தில் நாங்கள் ஷிண்ட்லர்ஸ் லிஸ்டையோ, இன்டர்ஸ்டெல்லரையோ, மகாநதியையோ தேடிப் போவதில்லை. இது வேற டிபார்ட்மெண்ட். அதனால் படத்தைப் பார்த்துவிட்டு “கதை சரியில்லை, படத்திலே ரியலிசம் குறைவு” என்று எவனாவது சொன்னால் அது வெறும் ஹைப்போக்கிரஸி. உள்ளூர ரசித்துவிட்டு வெளியிலே சீன் போடும் பேர்வழிகள். அடுத்த ரஜினி படத்துக்கும் முதல் ஷோ பார்த்துவிட்டு இதே ஸ்டேட்மெண்ட் விடுபவர்கள். அதில் அவர்களுக்கு ஒரு கெளரவம், போகட்டும்.

நாங்கள் ரஜினி படத்தில் ரஜினியை மட்டுமே தேடிப்போவோம். ரஜினியின் அண்மைக்காலப் படங்களான எந்திரன், கோச்சடையான் இரண்டிலுமே அந்த “ரஜினி” எலிமென்ட் மிஸ்ஸிங். இந்தப்படத்தில் வட்டியும் முதலுமாக ரஜினியைக் படம் முழுக்க ரஜினியாகவே கொண்டுவந்தமைக்கு ரவிக்குமாருக்கு ஒரு தாங்க்ஸ். கிழிஞ்ச டெனிம் ஜீன்ஸ், ஜக்கட் என்று படு காசுவலாக நடந்துவரும் ரஜினியைப் பார்த்து எவ்வளவு நாள் ஆகிவிட்டது. ஆளுக்கு அறுபதோ, அறுபத்தைஞ்சோ என்னெல்லாம் வயது சொல்கிறார்கள். ஹூ கேர்ஸ்? திரையில் ரஜினி ரஜினியாகவே தெரிகிறார். மோனா மோனாவில் ஒயிலாக நடந்துவரும்போது ராஜாதி ராஜா படம் ஞாபகம் வருகிறது. பிளாஷ்பேக்கில் படிகளில் இறங்கிவரும்போது “முத்து” ராஜா ஞாபகம் வருகிறார். வெள்ளைக்கார கலக்டரோடு ஆக்ரோஷமாக பேசும் காட்சிகள், சரத்பாபு, ரகுவரனோடு அந்த நாட்களில் ரஜனி விடும் சவால்களை ஞாபகப்படுத்துகிறது. சின்ன அலுமாரிக்குள் அனுஷ்காவும் ரஜினியும் சிக்குப்பட்டு நடக்கும் சில்மிஷக் காட்சிகளில் தொண்ணூறுகளின் ரஜினி - குஷ்பு காட்சிகளும் ஞாபகம் வருகிறது.

இந்தப்படம் படையப்பாவோ முத்துவோ கிடையாது. ஆனால் ரஜினியிடமிருந்து இன்னொரு படையப்பா, முத்து கூடிய சீக்கிரமே வரும், அதற்கு தல தயார் என்று கட்டியம் கூறும் படம் லிங்கா. ரஜினியிடம் அந்த நெருப்பு அப்படியே இருக்கிறது. ரவிக்குமார் அதைக்கொஞ்சம் ஊதி ஜூவாலை கூட்டியிருக்கிறார். இனி யாராவது பெட்ரோல் ஊற்றினால், நெருப்பு தன்னாலே பற்றும். யார் கண்டது. ஒரு பாஷா, அண்ணாமலை கூட வரும் வருடங்களில் வரலாம். ரஜினி இஸ் ரெடி. தலைவரே, இதெல்லாம் ஒருபுறம் இருக்க, அந்த சீனிகம் படத்தை ஒருதடவை பாருங்கள். நீங்களும் அனுஷ்காவும் அதில் நடித்தால், அந்தப்படம் ஒரு சகாப்தமாக மாறும். பிளீஸ். இனிமேல் கமல்மாதிரி, ஒரு மசாலா, ஒரு கிளாசிக் என்று மாறி மாறி செய்யுங்கள். சொதப்பினாலும் ஒகே. கோச்சடையானையே பார்த்தவர்கள் நாங்கள். அதைவிட மோசமான படமொன்று வந்துவிடுமா என்ன?

You got nothing to lose or prove.

முழுக்க முழுக்க ரஜினி படமாகவிருந்தும் இது ஏன் முத்து, பாஷா வகையறா இல்லை என்றால், ரஜினியின் முக்கிய இரண்டு அம்சங்கள் லின்காவில் மிஸ்ஸிங்.

ஒன்று சண்டைக் காட்சிகள். எங்கேயோ பார்த்துகொண்டு “என் நண்பனைக் கொன்னுட்டியேடா” என்று அடிக்கும் அடி. பாஷாவில் இந்திரனுக்கு மாணிக்கம் சாத்தும் முதல் சண்டைக்காட்சி. முத்துவில் இடம்பெற்ற நகைச்சுவையான சண்டைக்காட்சிகள் என்று எதுவுமே இங்கே இல்லை. அந்த ட்ரெயின் சண்டைக்காட்சி தரமானது என்றாலும் அதில் ரஜினி ட்ரேட்மார்க் போதாது. கிளைமாக்ஸ் சண்டைக்காட்சியை சவுந்தர்யாப் பொண்ணு வடிவமைத்திருக்கிறார் போலும்.  படத்தின் திருஷ்டிப்போட்டே அந்த கிளைமெக்ஸ் பலூன் சண்டைதான்.செம மொக்கை.

இரண்டாவது மிஸ்ஸிங் எதுவென்றால் ரஜினி ஸ்டைல். “கொஞ்சம் மேலே பாரு கண்ணா” பாஷா காட்சிகள் எதுவுமே படத்தில் இல்லை. சும்மா சடக்கென்று ஊஞ்சலை உருவி உட்கார்ந்து நீலாம்பரிக்கு முன்னாலே கால்போடும்  படையப்பா இல்லவே இல்லை. “பஜ்ஜி சீன்” இல்லை. அண்ணாமலை போர்ட் மீட்டிங் கிடையாது. “கறுப்பு ஆடு” கத்தவில்லை. ரஜினியின் ஸ்டைல் என்பது வெறும் கிமிக்ஸ் கிடையாது. அது கதையின் ஓட்டத்தோடு வரும்போது அதன் பரிமாணமே வேற லெவல்.  இந்தப்படத்தில் ஸ்டைல் தனித்தனியாக வருகிறது. காட்சியோடு ஒட்டியதாக எதுவும் … ம்ஹூம். அவ்வப்போது ஸ்டைலாக முடியை சுருட்டினாலும் அதையும் சந்தானம் காமடியாக்கிவிடுகிறார். பன்ச் வசனங்களும் அப்படியே. மிக வேகமாக கட கடவென்று பேசிவிட்டு திடீரென்று பிரேக் போட்டுப் பேசும் அவருடைய வசனநடை எதுவுமே இந்தப்படத்தில் இல்லை. வரும் ஒன்றிரண்டு வசனங்களிலும் சோபையே இல்லை. ஏதோ ஒரு களைப்போடு டப்பிங் பேசியிருக்கிறார் என்று தோன்றுகிறது.

என்னாச்சு ரவிக்குமார்?

Linga-Movie-Latest-Photos-1 படத்தின் இன்னொரு லெட் டவுன் ரகுமானின் பின்னணி இசை. ‘இந்தியனே வா’, ‘மன்னவா’ பாடல்கள் ரசிக்கும் படியானவை. ‘மோனா மோனா’ ரகுமானின் டொப் லிஸ்டில் சேரப்போகும் பாடல். ஆனால் பின்னணி இசை ஒட்டவேயில்லை. நம்மாளு ஒரு டியூனுக்கே ஆறுமாசம் வேலை செய்பவர். ஆறுமாதத்தில் படத்தையே எடுத்துக்கொண்டு போய்க்கொடுத்ததால் ரகுமான் ஆடிப்போயிருப்பது பின்னணி இசையில் தாராளமாகவே தெரிகிறது.

வி மிஸ் தேவா!

ஒன்பது மணிக்கு ஷோவுக்கு எட்டுமணிக்கே கூட்டம் கூடிவிட்டது. வரிசையின் முதல் ஆளாக நின்றது என்னுடைய நெருங்கிய வைத்திய நண்பர்கள். கிளினிக்கையும் மூடிவிட்டு, பொப்ஹோர்னும் கையுமாக உட்கார்ந்து, சுப்பர் ஸ்டார் என்ற எழுத்துக்கள் வரவும் கூடச்சேர்ந்து விசிலும் அடித்தார்கள். முதல்பாதி முழுதும் அந்த விசிலுக்கும் கைதட்டலும் குறைவில்லை. இரண்டாம்பாதி சீரியசாகவே போகிறது. “அதிரடிக்காரன்” மாதிரி ஒரு பாஸ்ட் நம்பர் இரண்டாம்பாதியில் வந்திருக்கவேண்டும். வரவில்லை. அவசர அவசரமான எடிட்டிங் படத்தின் ஓட்டத்துக்கு அவ்வப்போது தடை போடுகிறது.

இது எல்லாவற்றையும் ரஜினி என்கின்ற தாரக மந்திரம் தூக்கி நிறுத்துகிறது. அதனால்தான் ரஜினி சூப்பர்ஸ்டார்.

நானெல்லாம் பாபா படத்தையே பத்து தடவை பார்த்தவன். எந்திரனில் ரஜினியைத் தேடி களைத்துப்போனவன். கோச்சடையான் பார்த்து வெறுத்துப்போனவன். மூன்று மணிநேர முழுநீளப் படம் முழுதுமே ரஜினி வந்தால் கசக்குமா? ‘

I loved it.

இரண்டு மட்சில் சச்சின் டக் அடித்தால், மூன்றாவது மட்சிலே ஐம்பது ரன்கள் அடித்தாலும் கைதட்டி ரசித்துப்பார்ப்போம் அல்லவா. Form is temporary, class is permanent என்பார்கள். இத்தனை வருடங்களுக்குப் பின்னர் மைதானத்தில் இறங்கி ரஜினி அநாயசமாக அடித்த ஐம்பது ஓட்டங்கள்தான் லிங்கா.

செஞ்சரிக்காக வெயிட்டிங்.


10 comments :

  1. Anna,
    அப்பிடியே சுறா படத்துக்கும் ஒரு விமர்சனம் எழுதுங்க..
    ரொம்ப தான் கலாய்கிறாங்க..:P
    -இவன், விஜய் ரசிகர் பேரவை-

    ReplyDelete
    Replies
    1. சுறா? நான் பார்க்காத படத்துக்கு விமர்சனம் எழுதுறதில்ல ;)

      Delete
  2. ரஜினி தமிழர்களுக்காக என்ன செய்தார்? என் ரசிகர்களின் அன்புக்காக என்ன செய்ய போகிறேன் என்றே தெரியவில்லை என்று கூறிக்கூறியே கோடிகளில் சம்பாதித்து தன் குடும்பத்துக்காக சொத்துகளை வாங்கி குவித்ததை தவிர வேறு எதுவுமே செய்யவில்லை..யாழ்ப்பாணத்து தமிழர்கள் படித்தவர்கள், சினிமாவை சினிமாவாகவே பார்பவர்கள் அதில் கதாநாயகர்களாக வரும் நடிகர்களை காசுக்கு நடிக்கும் நடிகர்களாகவே பார்ப்பவர்கள்..அப்படியான ஒரு பின்னணியில் இருந்து வந்த நீங்கள் காசுக்கு நடிக்கும் ஒருவனை தலைவன் என்று விளிப்பது அருவருப்பை தருகிறது..தமிழர்கள் தலைவன் என்று விழிக்க தகுதி உள்ளவர் ஒருவர் தான் அது யாரென்பது இதை வாசிக்கும் ஒவ்வொரு தமிழனுக்கும் புரியும்..

    ReplyDelete
    Replies
    1. தலைவரே ஒரு சாதாரணமாக படத்தைப்பற்றி எழுதினதுக்கு ஏன் இவ்வளவு டென்ஷன் ஆகிறீங்கள். தலைவா, பாஸ், சார், சேர் என்று நாங்கள் வடிவேலு, முன் வீட்டுப்பெடியன், குழந்தை என்று எல்லோரையும் சொல்லுவோம். அது சும்மா பகிடிக்கு எண்டது வாசிக்கிறவனுக்கும் தெரியும். எழுதுறவனுக்கும் தெரியும். நான் மாசா மாசம் சம்பளம் செய்யுற வேலைக்கு வாங்குகிறேன். ரஜினி நடிச்ச நடிப்புக்கு பணம் வாங்குகிறார். தமிழருக்கு படம் நடிப்பதே பெரிய தொண்டு என்று நினைக்கிறார். அவர் மேடையில் என்ன பேசினா நமக்கென்ன வந்துது? எங்களுக்கு ரஜினி படங்கள் பிடிக்கும். கைதட்டிப்பார்ப்போம். தலைவா என்போம். அடுத்தநாள் எங்கட வாழ்க்கையைப் பார்த்துக்கொண்டு போய்விடுவோம். அவ்வளவுதான். நாளைக்கு கமல்படம் வந்தா கமல் தலைவர். சந்தானம் தலைவர். இது வெறும் சினிமா விமர்சனம் தலைவரே. பாருங்கள், நான் இருனூறு முன்னூறு பதிவுகள் எழுதியிருக்கிறன். ஆனா நீங்க சினிமா பதிவுக்குத்தான் கொமெண்ட் போட்டிருக்கிறீங்கள் :) நான் தெளிவாகவே இருக்கிறன்!

      Delete
    2. முதலாவதாக நான் உங்கள் பதிவுகளை தொடர்ந்து வாசித்து வருகிறேன்..ஆனால் இதுவரைக்கும் கொமெண்ட் போடவில்லை தான்..லிங்கா ஒரு below average movie for general audience. நீங்கள் ரஜினி fan ஆக விமர்சனம் செய்ததை நான் ஒன்றும் குறைகூறவில்லை.. எனது கோவம் எல்லாம் ரஜினியை தலைவர் எண்டது தான்..தமிழ் நாட்டில் ரஜினியை தலைவர் என்று மீடியா, சக நடிகர்கள், ரசிகர்கள் ஏதோ ஒரு காரணத்துக்காக அழைக்கிறார்கள் .. அது ஏன் என்பது எல்லோருக்கும் தெரியும்..அதை நீங்கள் follow பண்ண என்ன அவசியம் என்பது தான் என் ஆதங்கம்...நீங்கள் சந்தானத்தையும் வடிவேலுவையும் தலைவரென்று எழுதியிருந்தால் வழமை மாதிரியே வாசித்துவிட்டு கொமெண்ட் ஒண்டும் போடாமலேயே போயிருப்பேன்... ரஜினியை தலைவர் என்று எழுதியதை தான் பொறுக்க முடியவேயில்லை..

      PS: 1. I am not a fan of anyone 2. It is nothing personal as I don't know you personally.

      Delete
    3. நீங்கள் தொடர்ந்து வாசிப்பவர் எண்டால் அந்த தலைவர் குழப்பம் வந்திருக்காது. மன்மதகுஞ்சு முதல் வடிவேலுவரை எல்லோரையும் பகிடியாக தலைவர் என்று விளிப்பதுண்டு. இதில் எந்த சீரியஸ்னெசும் இல்ல. புளோவில எழுதுறது. சந்தானத்தை தலைவர் எண்டா அது பகிடி எண்டு விளங்குது, ரஜினியைச் சொன்னா பொறுக்கமுடியவில்லை எண்டால் அது உங்கள் prejudice எண்டது என்னுடைய எண்ணம்(நீங்கள் ஏற்றுக்கொள்ளவேண்டிய அவசியமில்லை). சரி. ஒரு சினிமா பதிவுக்கு இதுக்குமேலெ டிஸ்கசன் வேண்டாம். எழுதினன். கருத்து போட்டீங்கள். நான் விளக்கம் கொடுத்தன். நன்று. Let's move on.

      Delete
  3. Rajani is an Industry-Sujatha

    Ganesh (Siva)

    ReplyDelete
    Replies
    1. totally... entertainment industry to be precise.

      Delete

இந்த பதிவின் நீட்சி தான் உங்கள் கருத்துகளும். தெரிவியுங்கள். வாசித்து மறுமொழியுடன் வெளியிடுகிறேன்.

அன்புடன்,
ஜேகே